LAOAG CITY — Nainget ti panangmonitor ti Department of Trade and Industry (DTI) iti pannakaipatungpal ti price freeze kadagiti basic commodities iti Metro Manila.
Mainaig iti daytoy, ti nadakamat a pammilin ket sumaruno iti deklarasion ni Presidente Ferdinand Marcos a maikabil ti Metro Manila iti sidong ti State of Calamity iti iduduprak ti Super Typhoon Carina.
Segun kenni Trade Secretary Alfredo Pascual, ti panggep ti price freeze ket tapno masalakniban dagiti consumer manipud iti panagngato ti presio iti panawen ti krisis.
Kayat ti ahensia a siguraduen nga agtalinaed a makabael dagiti tagilako para kadagiti apektado a pamilia.
Saklawen ti price freeze dagiti sumaganad, bagas, mais, tinapay, nateng, karne ti baboy, baka, manok, itlog, gatas, kape, asukar, langis, asin, laundry detergent, kayo, uring, kandela ken sumagmamano nga agas a bigbigen ti Department of Health.
