LAOAG CITY – Kinumpirmaran ni Police Captain Michael Permison, chief of police ti PNP-Currimao ti pannakatay dagiti dua a baka kalpasan a nakuryente iti maar-aramid a rangtay iti paset ti Barangay Maglaoi Centro iti nasao nga ili.
Binigbig ni Permison ti akin-taraken kadagiti dua a baka a ni Romulo Sumngat, residente met laeng iti nasao a barangay.
Segun kenni Permison, idi kalman ket napan innala ni Sumngat dagiti baka na manipud iti taltalon ken dumalyasat da iti maar-aramid a rangtay nga isu met nakakuryentean ti baka.
Ummuna iti daytoy, kuna ni Permison nga inbaba ti contructor ti maar-aramid a rangtay ti waya ken nadalapos ti heavy equipment ken mabalin nga isu ti rason a naukisan daytoy.
Kunana nga idi magna ti baka iti nasao a paset ti maar-aramid a rangtay ket napaddakan da ti waya rason ti pannakakuryente dagitoy.
Naamoan a ti nasao a waya ket naikamang kenno naikonektar iti stop light.
Mainaig iti daytoy, kuna ni Permison a nagsasaritan ti contrctor ken ti akin-kukua ti baka ken nagpagnunumoan a mabayadan ti 70 a ribo a pisos ti maysa a baka gapo ta masikog ken ti maysa ket innalati agtagikua.
Innayon ni Permison a saan met a naan-ano ti akin-taraken ngem nakapakigtotan iti napasamak.
