Balligi a natiliw dagiti dua a lallaki iti naiyuswat a drug buy bust operation maysa nga apartment iti Barangay 15 ditoy ciudad ti Laoag.
Nabigbig dagitoy a da Noel Sagario, maysa a security guard ken tubo iti ili ti Bacarra, ken ni Mark Donel Toribio, tubo iti ili ti Solsona.
Naamoan a ni Toribio ket datin a naibalod gapo met laeng iti panaglabsing iti RA 9165 idi Enero 22, 2021 ken karuruwar na laeng iti pagbalodan iti napalpalabas a bulan babaen iti probation.
Basar iti impormasyon, kabayatan ti panaginnawat ti pusuer buyer ken ni Toribio iti maipagarop nga iligal a droga ket naregreg ni Sagario ti paltog na.
Nakumpiskar manipud kenn Sagario ti kalibre 38 a paltog ken ni Toribio ket tallo a sachet ti maipagarop a shabu pakairamanen ti nagatang ti pusuer buyer ken ti sangaribo a pisos a buy bust money.
Saan met a kayat da Toribio ken Sagario ti nagkomento mainaig iti pannakatiliw da.
Mainaig iti daytoy, kuna ni Police Lt. Jackson Sugayen, mangidadaulo ti Provincial Drug Enforcement Unit (PDEU) a ni Toribio ket miembro ti Menrigue Drug Group ken idi nakaruar iti pagbalodan ket intultuloy na ti iligal nga aktibidad na.
Inbatad na pay a basar iti impormasyon da, ibagbaga ni Toribio a nakapsot ti intelligence ti Anti Drug Group gapo ta maipagarop a saan laeng a miembro daytoy no diket isuna ti paggapoan ti droga nga usaren wenno ilako ti kagrupo na.
Inlawlawag na a ni met Sagario ket agserserbi a runner wenno isu ti agibunbunong iti iligal a droga, ken drug surenderee daytoy idi 2016.
Kunana a ni Toribio ket adda iti Regional level idinto a ni Sagario ket street level.
