LAOAG CITY – Inpetteng ti Department of Foreign Affairs (DFA) a mabalin latta a tulungan ti pagilian ni dati a Presidente Rodrigo Duterte ken dagiti pamilia daytoy kas Pilipino.
Inlawlawag ni Department of Foreign Affairs Undersecretary Eduardo de Vega nga idi naikabil ti dati a Presidente idiay The Hague, Netherlands ket nagtalinaed ti panagbalinna a Pilipino ken karebbenganna a maipaayan ti aniaman nga assistance a mabalin nga iyasideg ti Department of Foreign Affairs.
Iti saludsod no mabalin nga agsapata ni dati a Presidente Duterte iti Philippine Embassy idiay The Hague, Netherlands, inbatad ni De Vega a posible daytoy nga aramiden ti embahada gapu ta ti nasao nga opisina ket agserserbi nga extension ti gobierno ti Pilipinas.
Nupay kasta, agbalin a dakkel a saludsod latta no palubusan ti International Criminal Court (ICC) a makaruar ti dati a Presidente ken agbiahe nga agturong iti embahada tapno agsapata kas baro a naelektaran a Mayor idiay Davao City nangruna ket saan a miembro iti International Criminal Court ti Pilipinas.
Dinakamat ti Department of Foreign Affairs official ti legal theory a ti bileg ken otoridad ti embahada ket limitado laeng iti embassy premises.
Kayatna a saoen, kasapulan nga ikabil ni Duterte iti embahada ti Pilipinas tapno ditoy nga agsapata.
Maipalagip a nakagun-od ti landslide win ti dati a Presidente kalpasan a nagpaidasig manen isuna iti kina-Mayor idiay Davao City. I
Daytoy ket iti baet ti pannakaibaludna iti International Criminal Court detention facility iti kangitingitan ti kampania agingga iti panagbubutos.
Kabayatanna, agpada nga adda idiay The Hague ti embahada ti Pilipinas ken ti headquarters ti International Criminal Court.
