LAOAG CITY – Inprisentaren dagiti Economic Managers ti gobierno iti Senado ti mailunglungalong a National Budget para inton sumaruno a tawen.
Iti panagdengngeg ti Senate Committee on Finance nga idadauloan ti baro a Chairman a ni Senadora Grace Poe, inpetteng ni Recto nga adu a Pilipino iti napalabas a tawen wenno 2.5 million a Pinoy ti nagnam-ay iti panagrigat iti panagbiag no sadinno bimmaba ti poverty rate iti 15.5 percent.
Gapu iti daytoy, nakatutok ita ti gobierno a maipababa pay daytoy iti single digit a 9% apaman a madanon ti 2028.
Inpannakkel met ni Recto ti panagbaba ti inflation manipud idi Enero agingga idi Hulio 2024 no sadinno dumanon laengen daytoy ti 3.7% nga asideg iti target a 3.4%.
Nupay dumanonen iti trilyon ti utang ti Pilipinas, inbatad ni Recto, awan ti rumbeng a pakadanagan gapu ta kabaelan daytoy a bayadan ti gobierno.
Nupay kasta, inpanamnama ni Recto kadagiti Senador nga addada iti umiso a dana ken napintas ti development iti target para iti ekonomia.
Innayonna a ti Pilipinas ti maysa kadagiti kapaspasan iti panagdur-as ti ekonomia iti intero nga Association of Southeast Asian Nations (ASEAN).
