LAOAG CITY – Nabirukanen a bangkay ti maysa nga inhinyero ti Prime Water kalpasan iti maipagarop a panagbekkel na iti uneg ti apartment na iti Barangay 24 ditoy ciudad ti Laoag agarop alas-otso idi rabii.
Nabigbig ti biktima a ni Engr. Rizaldy Santos Bautista, 25, baro, taga 143 St. Tambubong, San Rafael, Bulacan ngem agdama nga agnanaed ditoy ciudad
Basar iti report, nakigtot ti kakwartoan ti biktima a ni John Michael Bustamante Tubije, 24, baro ken taga Daisy Extention St. West Fairview Country Homes, Quezon City idi makita na ni Bautista a nakabitin usar ti electric wire ken maipagarop nga awanen ti angesna.
Kinumpirmaran ni Doctor Renato Mateo, City Health Officer ditoy ciudad ti Laoag a pimmusay ti biktima gapu iti panagbekkel na.
Inbatad met ni Police Master Sergeant Sean Francis Bogaoisan iti PNP a posible a depresyon ti makaigapu a nagpakamatay ti nasao a biktima.
Agtultuloy ti imbestigasyon dagiti otoridad mainaig iti daytoy a pasamak.
