LAOAG CITY – Inanunsio ni United States President Donald Trump a nagpirman ti Estados Unidos ken Iran iti maysa a memorandum of understanding a gagem a lippasen ti agtultuloy a tension iti Gulf region ken lukatan manen ti Strait of Hormuz.
Inbatad ni Trump a napirmaanen ti amin a katulagan kabayatan nga adda iti G7 summit idiay France.
Inlawlawagna nga apagapaman a nalukatan ti pagdalyasatan ti langis a sumagmamao a bulan a naapektaran ti blockade a nangitunda ti global economic disruption.
Naikeddeng nga iwayat ti special ceremony iti Geneva inton Biernes idinto a manamnama nga iparuk-at iti publiko ti sibubukel a detalye ti katulagan kadagiti sumaruno nga aldaw.
Nupay kasta, insigida a sinita daytoy dagiti kritiko ti Estados Unidos a nagpanawagan ni Senate Democratic leader Chuck Schumer nga ipublikar ti sibubukel a linaon ti katulagan ken ilawlawag no ania ti pudno a kasukat ti nasao a deal pakairamanan ti epekto daytoy iti seguridad ti Amerika.
Kagiddan ti panagpirma iti katulagan, naipadamag a bimmaba ti presio ti langis iti world market gapu iti namnama a malpasen ti krisis iti suplay idinto a ngumatngato met dagiti stock market indices.
Malaksid iti panaglukat ti Strait of Hormuz, naipadamag pay a karaman iti katulagan ti panangipatungpal ti 60 nga aldaw a ceasefire para iti negosasion mainaig iti dadakkel nga isyu pakairamanan ti nuclear program ti Iran ken posible a pannakaikkat ti sanction.
Maipalagip nga inrakurak dagiti opisial ti Estados Unidos a mabalin a maaddaan ti dadakkel nga economic benefits para iti Iran ti katulagan ngem kasukat daytoy dagiti kondision a saan daytoy a mangbukel ti nuclear weapon.
