LAOAG CITY – Inbatad ni Police Lt. Col. Amador Quiocho, ti chief of police ditoy ciudad ti Laoag a nagballigi ti insayangkat da a drug buy-bust operation iti paset ti Barangay 5 ditoy ciudad.
Binigbig ni Quiocho ti subject ti operasyon a ni Lester Evans y Raquiza, agtawen ti 40, maysa a gay freelance designer ken event stylist ken residente iti Barangay 21 ditoy ciudad.
Segun ken ni Quiocho, ti suspek ket karaman iti DI watchlist ken nalatak daytoyen gapu iti maipagarop a kaadon dagiti customers na.
Inbaga ti opisyal a saan a nagsurrender ti suspek isut gapuna nga intultuloy da ti nangmonitor kenkuana.
Inpakaammo ni Quiocho a malaksid iti inlako ti suspek a maysa a plastic sachet ken nakakumpiskar da pay iti ikot na ti dua pay a plastic sachet a naglaon ti maipagarop a shabu.
Innayon na a possible nga adda ti koneksyon ni Evans ken ti immunan a natiliw da iti drug buy-bust operation ditoy ciudad.
Kabayatanna, inistorya ni Evans nga awan ti ammo na iti naala kenkuana nga ebidensya.
Kuna na a napan iti Barangay Navotas tapno gumatang ti mula gapu ta adda ti nagpaaramid kenkuana ti garden ken daytoy ti ikamkamakam na nga ileppas.
Idi agawid daytoy ket nakigtot gapu ta adda ti immasideg kenkuana ken maipagarop nga innala da lattan kalpasan na ket addan ti nairuwar nga item.
Inadmitir na a nagus-usar idi iti illegal a droga ngem insardeng nan gapu ta isunan ti tumaktakder a padre de pamilya kalpasan a pimmusay ti kabsat na a lalaki.
Mamati ti suspek nga ado dagiti maap-apas kenkuana gapu ta ado dagiti sanikua a naibati ti pimmusay a kabsat na ken isuna amin ti nakaitalkan na.
