LAOAG CITY- Inbatad ni Mr. Mark Anthony Gaviola, Manager ti Gaviola Transport Group iti ruta a Laoag-Burgos a masdaaw da no apay a saan da a nairaman iti “libreng sakay” nga inpatungpal ti gobierno probinsyal.
Inpetteng ni Gaviola a saanda pulos a napakaammoan wenno naimbitaran mainaig iti pannakaipatungpal ti “libreng sakay” idinto nga ado met dagiti pasahero iti ili ti Burgos a mabalin da nga ilugan.
Kuna na a no naimbitaran da para iti programa ti gobierno probinsyal babaen iti Metro Ilocos Norte Council (MINC) a “libreng sakay” ket sidadaan da koma met a mangusar iti dua wenno tallo a lugan da.
Nadakamat pay ni Gaviola a mabalin nga adda ti personal a gura da kadakuada isut gapuna a saanda nga inraman dagitoy iti “libreng sakay”.
Innayon na a ti laeng ruta a Laoag-Burgos ti awan ti “libreng sakay” na isut gapuna nga agpanpanawagan da ken ni Governor Cecilia Araneta-Marcos nga iraman da koma met dagitoy para iti nasao a programa.
