LAOAG CITY – Kinarit ni Gob. Matthew Marcos Manotoc dagiti Micro Small and Medium Enterprises wenno MSME’s a nagbalin a benepisiario ti maikadua a bansada ita a tawen iti programa ti Provincial Government of Ilocos Norte babaen iti Micro Small and Medium Enterprises Office wenno MSMEO a Mataginayon a Progreso Assistance a mangpadakkel iti naipaay kadakuada a tulong pinansial.
Inbatad ti gobernador nga ikarkararagna a ti naipaay a lima ribu a pisos iti tunggal maysa ket mapagbalin a lima gasut a ribu a pisos kadagiti masungsungad nga aldaw.
Segun kenkuana, dua gasut duapulo ket innem (226) dagiti benepisiario iti maikadua a bansada.
Mainaig iti daytoy, kunana nga agdagup iti maysa a milyon dua gasut ket tallopulo ribu (1,230,000) a pisos ti naipaay a tulong kadagiti nadakamat a kakailian a babassit a negosiante.
Inlawlawagna a dagitoy ket naggapo iti nadumaduma a paset ti probinsia a pakairamanan dagiti manipud iti umuna a Distrito kas iti siudad ti Laoag, Sarrat, Vintar, Bangui, Piddig, Bacarra, Dumalneg ken Pagudpud idinto nga iti maikadua a Distrito ket manipud iti siudad ti Batac, Solsona, Dingras, San Nicolas, Marcos, Paoay ken Pinili.
Kagiddan daytoy, inpagunamgunamna iti Micro Small and Medium Enterprises Office nga idadauloan ni Mrs. Elma Gabriel a masapul nga ikalikagumda a saan a maparigatan dagiti kakailian iti proseso tapno alisto da laeng a magundawayan ti nasao a programa ti gobierno probnsial para kadagiti babassit a negosiante.
Malaksid iti daytoy, inbilin pay ti gobernador ken ni Gabriel iti panangisiguradoda a maidanon ti nasao a programa kadagiti babassit ken saan a nadur-as nga ili ditoy probinsia.
Innayonna a daytoy a banag kalpasan a naobserbaranna a kaaddoan kadagiti benepisiario ket manipud iti siudad ti Batac ken iti siudad ti Laoag.
Kabayatanna, ginutigotna dagiti maseknan a manggundaway kadagiti nadumaduma a serbisio ti Micro Small and Medium Enterprises Incubation Center a masarakan iti La Tabacalera para kadagiti Micro Small and Medium Enterprises.
