LAOAG CITY – Binigbig ni Gob. Matthew Marcos Manotoc ti kinapateg ti agtultuloy a panangpadur-as ti teknolohia para kadagiti umili nangnangruna kadagiti mannalon.
Mainaig iti daytoy, inpadanonna ti napalaos a panagyamanna iti agtultuloy a panangipapaay ti Department of Agriculture ti tulongna ditoy probinsia babaen iti panangipaayda kadagiti makinaria a kasapulan dagiti mannalon ken pakairamanan ti konsulada ti Peoples Republic of China.
Naammoan a kadagupan dagiti naibunong iti kallabes a makinaria ken kagamitan ket nangipaay ti Department of Agriculture PhilMech iti maysa a “riding type transplanter” idinto a nangipaay met ti konsulada ti sangapulo a solar powered irrigation system.
Inbatad ti gobernador a dakkel a tulong dagiti maibunbunong a makinaria, kagamitan ken dagiti dadduma pay a kasapulan dagiti mannalon para iti pannakapasayaat ti apit dagitoy.
Nupay kasta, inannugotna a saan laeng a rumbeng a maisentro iti pannakapasayaat ti teknolohia ken mechanization ti maipaay a suporta kadagiti mannalon ngem nasken a matulungan pay dagitoy iti pannakaiproseso dagiti produktoda agingga iti pannakailako dagitoy a produkto.
Inpasiguradona a kas gobernador ti probinsia ket ikarigatanna a maipaay ti naan-anay a tulong a kasapulan dagiti mannalon ditoy probinsia.
Kabayatanna, naammoan nga agbalor iti nasursurok ngem limapulo ket walo a milyon (58M) a pisos dagiti makinaria, kagamitan ken agricultural inputs a naipaay kadagiti mannalon.
