LAOAG CITY – Pagtutulagan a naimbag ti grupo dagiti mannalon ken mangngalap ditoy ciudad ti Laoag ti agbalin a takder da iti main-inaw nga ordinansa para iti pannakairehistro dagiti makinarya ken equipments a mausar a pagkalap ken pagtalon.
Daytoy ti inbatad ni Mr. Marcelino Morales, Presidente ti Federated Association dagiti mannalon ken mangngalap ditoy ciudad ti Laoag.
Saan met a diretos a sinungbatan ni Morales ti saludsud kenkuana no pabor wenno saan iti daytoy nga addang gapu ta no maipursige ket umab-abot iti 300 a pisos ti registration fee iti kada makinarya wenno equipment a mausar a pagkalap ken pagtalon.
Naamoan a ti nasao nga addang ket inlungalong a mismo ti Department of Agriculture (DA).
Maipalagip nga inbaga ni Konsehal Juan Conrado Respicio III ditoy ciudad ti Laoag a masapol a maala ti opinyon dagiti amin a mangngalap ken mannalon babaen ti pannakaisayangkat ti public hearing.
