LAOAG CITY – Inbatad ti Bureau of Immigration (BI) a ginandat ni dati a Presidential spokesperson Harry Roque agturong iti Estados Unidos ngem nalapdan bayat ti kaadda na iti Japan.
Inreport ti Bureau of Immigration ti nasao nga impormasyon iti Senate justice and human rights subcommittee hearing kalpasan a sinaludsud ni chairperson Senator Risa Hontiveros no ayanen ni Roque.
Nupay kasta, kuna ni Bureau of Immigration Intelligence Division Chief Fortunato Manahan a kalpasan a nalapdan ni Roque iti panagturong na koma iti Estados Unidos kabayatan ti kaadda na iti Japan ket saan dan nga ammo no ania ti simmaruno a napasamak.
Inrakurak pay ti Bureau of Immigration a sakbay a nagturong ni Roque iti Japan ket immuna a nagturong da iti asawa na iti Singapore kalpasan na ket napan da iti Dubai.
Agpapan ita ket burburtiya paylaeng dagiti otoridad no siasinno ti timmulong ken ni Roque a nakaruwar iti Pilipinas.
Maipalagip a nagpukaw ni Roque sipud nairaman ti nagan na iti operasyon ti Philippine Offshore Gaming Operators iti pagilian, partikular iti maipagarop a pannakainaig na iti Lucky South 99, ti rinaot dagiti otoridad a POGO firm idiay Porac, Pampanga.
