LAOAG CITY – Nasakit ti nakem ni Mrs. Corazon Abad, ti ina ti subject ti search operation a ni Mr. Carlos Garcia, agtawen ti 54, naasawaan, mannalon, dati a miembro ti CAFGU ken residente ti Barangay 25, Tamdagan iti ili ti Vintar iti pannakaarestar iti anakna.
Daytoy ket kalpasan a maipagarup nga awan pulos ti kinapudnona dagiti nakumpiskar dagiti otoridad iti pagtaenganda.
Segun kenkuana, mamati daytoy nga inmulada amin dagiti ebidensia gapu ta saan a kukua ti anakna ken saan nga agus-usar kadagitoy a banag.
Inbatadna nga adda ti uppat nga indibidual ti immun-una a simrek iti pagtaenganda sakbay pay a pormal a naipatungpal ti search operation.
Kunana a dagiti maitudtudo nga uppat nga indibidual ket patienna a kameng ti pulisia a nangidaulo ti nasao nga operasion.
Inpalgakna nga adda dagiti umap-apal ken makagurgura iti anakna a mabalin nga akin-aramid iti likudan ti napasamak.
Maipalagip nga inbatad ni Police Captain Roi Manuel Ordonio, ti Hepe ti Philippine National Police iti ili ti Vintar a kabayatan iti panagsukimatda iti pagtaengan ni Garcia ket nakumpiskarda ti maysa nga hand grenade (m26 fragmentation), pito a pedaso ti bala ti shotgun, 11 a pedaso a bala ti caliber 22 a paltog, maysa a caliber 38 revolver ken maysa a caliber 5.56 homemade a paltog.
Iti agdama, nagtalinaed pay laeng ti suspek iti kustodiar ti Philippine National Police iti ili ti Vintar.
