LAOAG CITY – Awan ti nadadael a pasilidad ti Ilocos Norte Electric Cooperative iti iduduprak ti bagyo Nando ditoy probinsya.
Daytoy ti inpasigurado ni Mr. Cipriano “Perry” Martinez, ti Acting Assistant Manager ti kooperatiba.
Inbatad na a dagiti laeng linya ken poste ti kuryente ti naaddaan ti problema gapu iti kinapigsa ti angin iti iduduprak ti bagyo.
Nupay kasta, inpanamnama ni Martinez nga ikarigatan da nga isubli ti supply ti kuryente iti intero a probinsya iti kabiitan a panawen.
Inlawlawag na a ti laeng mangpabayag ket ti kaado dagiti masapol a mawaknitan tapno al-alisto a madanun dagiti linemen dagiti lugar a kasapulan a pagtarimaanan da ti linya ken poste ti kuryente.
Kabayatanna, sinaludaran ni Martinez dagiti linemen gapu ta uray kasanu ti kinadelikado ti sitwasyon ket nakasagana da latta a mangaramid iti trabaho da.
Nagpanawagan met ni Martinez kadagiti member-consumers iti nan-anay a pannakaawat da no saan a dagus a naisubli ti supply ti kuryente da.
