LAOAG CITY – Madanagan ti International Committee of the Red Cross (ICRC) ti kumarkaro a situasion idiay Gaza.
Daytoy ket kalpasan iti agtultuloy a panangraut ti Israel idiay Gaza a nangitunda ti pannakatay dagiti ginasut nga indibidual.
Iti kaudian a panangraut ti Israel ket dumanonen iti 95 a tattao ti natay iti uneg ti maysa nga aldaw.
Maam-amak met ti United Nations (UN) ti panagadu dagiti matmatay gapu iti panagbisin kalpasan a linappedan ti Israel ti pannakaipaay kadagiti taraon ken agas.
Maipalagip a naruay a pagilian ti nangkondenar iti agtultuloy nga ar-aramiden a panangatake ti Israel idiay Gaza a nakatayan dagiti naruay a sibilian.
