LAOAG CITY – Nagballaag ti Iran nga agbalin a lehitimo a targets na dagiti US bases, dagiti pasilidad ken assets no rumaot ti Amerika.
Daytoy ket iti baet ti inpaay a pawayway ni US President Donald Trump iti Iran a 10 agingga iti 15 nga aldaw tapno maaddaan ti nuclear deal.
Inaramid ni Iranian Ambassador to the United Nations Amir Saeid ti natured a rakurak na iti maysa a surat a naipatulod ken ni UN Secretary General Antonio Guterrez ken Security Council president.
Nailanad iti sulat ti maysa a social media post ni Trump idi Miyerkules, no sadinno a nadakamat na a possible a kasapulan ti Estados Unidos dagiti base militar ti United Kingdom, karaman ti maysa nga adda iti Indian Ocean Island, no saan a makitulag ti Iran.
Segun iti Iran Ambassador, ti kastoy a rakurak ti US President ket mangiparipirip ti pudno a peggad ti military aggression, a ti resulta ket pakadadaelan ti rehiyon ken mabalin a mangitunda ti nakaro a pangta iti kapia iti sangalubungan ken seguridad.
Immunan a naireport nga agsagsaganan ti Amerika a mangiyuswat ti strike iti Iran iti baet ti panangipatulod ni Trump ti warships, fighter jets ken dadduma pay a military force iti Middle East tapno malapdan ti Iran manipod iti panagaramid ti nuclear bomb, banag a naglikudan ti Tehran.
