LAOAG CITY – Mangipatungpal ti Japan ti naig-iget a pagannurotan para kadagiti gangannaet nga agkalikagum nga agnegosio iti pagilianda.
Basar iti dokumento nga inruar ti Ministry of Justice, naipangato iti 30 million yen wenno sumurok-kumurang a P11.9 million ti kasapulan a kapital para iti ”business and management visa” nga innem a daras a nangatngato maidasig iti agdama a 5 million yen a kapital.
Karaman iti baro a pagalagadan ti pannakai-require ti uray maysa a full-time nga empleado idiay Japan.
Daytoy nga addang ket kagiddan ti resulta ti eleksion idi Hulio a pimmigsa ti suporta para iti maysa nga oposision a partido a saan nga umanamong iti imigrasion a nagbalin a rason ti pannakapukaw ti mayorya ti ruling coalition.
Agpaut ti panangkonsultar iti publiko agingga inton Septiembre 24 ken manamnama a maipatungpal dagiti pannakabalbaliw inton Oktubre.
Iti agdama, sumurok-kumurang 41,600 nga indibidual ti addaan ti nasao a visa idiay Japan a sumurok kagudua ket dagiti Chinese national kas basar iti immigration.
