LAOAG CITY – Dinayyeg ti magnitude 7.7 a gingined ken sumagmamano nga aftershocks ti kabaybayan iti akindaya a paset ti Indonesia.
Nairekord ti saan a lumabes ti maysa a metro wenno tallo a kadapan ti tsunami waves iti sumagmamano a lugar, basar iti geophysics agency ti pagilian wenno Badan Meteorologi, Klimatogi, dan Geofisika (BMKG).
Gapu iti daytoy, naruay nga indibidual ti rimmuar kadagiti pagtaenganda.
Nupay kasta, inbatad ti pannakangiwat ti national disaster mitigation agency a ni Dodi Yuleova nga awan pay ti inisyal a report ti pannakadadael ti gingined a narikna ti maysa a minuto kadagiti rehion kas ti Nagekeo ken Bima.
Mainaig iti daytoy, naipakita iti maysa a video ti pannakanarpuog dagiti debris ti maysa a pasdek iti maysa a port idiay Maumere, Sikka Regency iti Flores Island ken ti panagikkis ken panagtaray dagiti indibidual ti kalsada.
Basar iti rekord ti Badan Meteorologi, Klimatogi, dan Geofisika (BMKG), ti umuna a gingined ket napasaran ti alas-4:58 ti bigat ken adda ti kauneg a 15 a kilometro wenno 9 a milya ken napasarunoan ti sumagmamano nga aftershocks.
Kabayatanna, basar iti tsunami warning center ti Australia a ti undersea earthquake ket awan ti tsunami threat-na iti Australian mainland, isla wenno teritorio.
