LAOAG CITY – Dinayaw ti Kamara ti Armed Forces of the Philippines-Military Intelligence Group, Intelligence Service of the Armed Forces of the Philippines, Presidential Anti-Organized Crime Commission ken Bureau of Immigration gapu iti panangarestarda ken ni Tony Yang wenno Hongjiang Yang.
Mainaig iti daytoy, ni Yang ti in-inauna a kabsat ti dati a Duterte Presidential Adviser a ni Michael Yang ket naaresto idiay Ninoy Aquino International Airport Terminal 3 manipud iti Cagayan de Oro para iti mission order gapu iti panagbalinna a “undesirable alien”.
Inwaragawag ni House Deputy Speaker Aurelio Gonzales Jr. ti pannakaarestar ni Yang ket sakbay a malpas ti pannakadengngeg ti Quad Committee.
Segun ken ni Gonzales, naparpartak ti panangbirok ken panangarestar iti kabsatna a ni Michael Yang ken manamnama a mangilawlawag iti relasion dagiti kakabsatda iti isyu ti money laundering, drug trafficking ken Philippine Offshore Gaming Operator.
Kabayatanna, immun-unan nga inbilin ti Quad Comm ti pannakaarestar ti dati a Duterte presidential adviser a ni Michael Yang wenno Hong Ming Yang gapu iti pakanaignna iti P3.6 billion drug buy bust idiay Mexico, Pampanga idi napan a tawen.
