LAOAG CITY – Napaltu-paltogan ni Barangay Chairman Mark Adrian “Macky” Barba ti Brgy. 6 iti ili ti San Nicolas iti sango ti maysa nga hotel iti Brgy. 22 iti ili ti San Nicolas.
Malaksid ken ni Kapitan Barba ket napaltu-paltogan pay dagiti dua a bodyguard-na a kaduana a nakalugan iti Innova.
Nagsagaba ti naruay a tama ti paltog iti nagduduma a paset ti bagi dagiti tallo nga indibidual.
Gapu iti daytoy, dagus a naitaray dagiti dua a biktima iti Gov. Roque B. Ablan Sr. Memorial Hospital idinto a ti maysa pay a biktima ket naitaray iti Black Nazarene Hospital.
Naammoan nga agawid koman da Kapitan Barba kaduana dagiti kakaduana ngem kellaat a pinaltu-paltogan dagiti saan pay a nabigbig a suspek.
Iti agdama, agtultuloy ti maiwaywayat a naun-uneg nga imbestigasion maipanggep iti napasamak a pammaltog.
