LAOAG CITY – Inyistorya ni Ms. Ellaine Joy Calapao Sanidad iti Barangay Barani iti ciudad ti Batac ti kapadasan na agingga a nakaawat ti highest distinction iti University of Oxford idiay United Kingdom.
Naawat ni Sanidad ti kangatoan a pammadayaw iti babaen ti Master in Diplomatic Studies program iti nasao a prestihiyoso nga unibesidad ken agturpos iti Oxford degree and award intono March 12, 2022.
Segun kenni Sanidad, idi 2016 ket nagaplikar para iti Chevening Scholarship, maysa nga UK-based scholarship nga ididiaya ti Foreign and Commonwealth and Developmet Office kadagiti eligible developing countries a pakairamanan ti Pilipinas, ngem saan a napagasatan.
Nupay kasta, sipud iti dayta a tawen agingga idi 2019 ket insagana da ti bagbagi na para iti panagaplikar na manen iti scholarship agingga a naakseptar iti daytoy idi 2020.
Kunana nga iti makatawen, nangala ti Masters Degree iti United Kingdom agingga a nagaplikar kadagiti tallo nga unibesidad idiay UK pakairamanan ti Oxford University ken balligi met daytoy.
Dinakamat na nga idi nagaplikar iti Oxford University ket saan unay a confident a maakseptar ngem idi naawat na ti result ket nakasangit gapo ta nakastrek iti prestihiyoso nga unibersidad.
Inlawlawag na nga idi damo ket ti indiaya laeng kenkuana ti Oxford ket Postgraduate Diploma (PGDip) in Diplomatic Studies ken daytoy ket saan a Masters Degree.
Gapo iti daytoy, kunana nga iti laksid nga awan ti appela process iti application iti Oxford ngem nagapela iti namindua a daras para iti Masters Degree tapno mausar na ti scholarship na ngem saan a napatgan gapo ta pinalen ti desisyon.
Iti maikatlo nga apela na ken maudi nga aldaw wenno deadline para iti Chevening Scholarship ket naawat na ti napintas a damag a nakastrek para iti Masters Program.
Ms. Ellaine Joy Calapao-Sanidad
Inpalgak na a napalaos ti ragsak na a nakastrek iti unibersidad ngem ad-adda manen daytoy idi adda ti award na a kangatoan a pammadayaw nangruna ket naiget ti kompetisyon.
Mainaig iti daytoy, kunana a maysa kadagiti kangrunaan a napasaran na bayat nga adda idiay United Kingdom ket ti iliw na iti pamilya na no sadinno nga immabot iti innem a bulan sakbay a naka-move on iti iliw na malaksid laeng iti academic pressure iti Oxford.
Kunana a bayat pay ti panagbasa na ket nadiagnosed ti ama na iti dimentia, adda ti nagpositibo iti covid-19 a kameng ti pamilya na ken pimmusay ti ikit ken kasinsin na.
Innayon na a fully funded ti scholarship na rason a ti tinutukan na ket ti panagbasa na.
Kabayatanna, kuna ni Sanidad nga iti agdama ket prayoridad na pay laeng ti panaginana ken ti pamilya na ngem kalikagom na nga agbirok ti trabaho ngem saan na pay a masigurado no anya wenno sadinno ti serkan na a pagtrabahoan.
