LAOAG CITY – Natay ti maysa a karpintero iti napasamak a pammaltog iti Barangay 22, San Cristobal, Sarrat, Ilocos Norte.
Daytoy ti kinumpirmaran ni Police Staff Sergeant Dennis Esteban, chief investigator iti PNP iti ili ti Sarrat.
Binigbig ni Esteban ti biktima a ni Roliver Bangalan, 38, karpintero, taga Pamplona, Cagayan idinto a ti suspek ket ni Regie Ganotisi, residente met laeng iti Barangay 22 iti nasao nga ili.
Iti eksklusibo nga interview ti Bombo Radyo Laoag ken ni Esteban, inbatad na a nagprob-probokar ti biktima iti balay ti suspek gapu ta maipagarop a saanna a maawat ti panangisina kenkuana ti nobya na a kabsat ni Ganotisi.
Kuna na nga idi inanawa ti suspek ket nagawid ti biktima, ngem saanda a ninamnama nga agsubli daytoy ken intuloy na manen ti nagprobokar ken inpilit na pay ti sumrek iti uneg ti balay ti suspek.
Gapu iti daytoy, napan manen inanawa ti suspek ngem maipagarop a ditoyen a nagsinsinnungbat dagiti dua agingga nga inasut ti biktima ti paltog na a maysa a magnum 357.
Nakita ti suspek ti paltog isut gapuna a nagin-innagaw da iti biktima agingga nga aksidente a nakalbit ni Ganotisi ti gatilyo ti paltog a nakatamaan ti bagi ken abaga ni Pangalan a nangitunda ti ipupusay na.
Kalpasan ti insidente ket boluntaryo a simmuko ti suspek iti kwerpo ti pulisya nga iti agdama ket nagtalinaed daytoy iti kustodyar da.
Kinumpirmaran pay ni Esteban nga adda ti maysa a sachet a naglaon ti maipagarop a marijuana a naala iti bulsa ti biktima.
Agpapan ita ket saan pay a nakontak ti PNP ti pamilya ti biktima tapno maipakaammo kadakuada ti napasamak kenkuana.
Agtultuloy ti imbestigasyon dagiti otoridad mainaig iti nasao a pasamak.
