LAOAG CITY – Pimmusay ti maysa a karpintero kalpasan a natennag bayat nga agtrabtrabaho iti maipatpatakder a pasdek idiay Barangay Magat Salamat ditoy ciudad ti Laoag.
Nabigbig daytoy a ni Mr. Loreto Batangan, agtawen ti 39, ken residente iti Barangay Salet Bulangon ditoy ciudad.
Segun iti kabsat ni Batangan a ni Mr. Jonathan Batangan, kabayatan nga adda iti maikatlo a kadsaaran ti biktima ket natennag iti maikadwa a kadsaaran ti pasdek.
Inbatad na a basar iti palawag dagiti kaubraan ni Loreto ket kellaat a natennag rason a nagsagaba ti sugat iti nagduduma a paset ti bagi na kangrunaan ti ulo na.
Inlawlawag na a basar met iti impormasyon a naala na ti ospital ket nangato ti blood pressure ni Loreto idi maitaray iti balay pagagasan ken possible a simken ti highblood na bayat ti panagtrabaho na.
Kinumpirmaran pay ni Jonathan nga adda pay ti sakit nga epilepsy wenno panagkissiw ti kabsat na.
Innayon na nga inpasingked met ti engineer ken foreman ti pagtrab-trabahoan a pasdek ti biktima a nakasagana da a tumulong iti pamilya ni Loreto.
