LAOAG CITY – Inbasuran ti Office of the Ombudsman ti kaso a naipila kontra ken ni Department of Public Works and Highways (DPWH) Secretary Vince Dizon mainaig ti konstruksyon dagiti pasilidad iti 2019 Southeast Asian (SEA) Games gapu iti kinakurang ti ebidensya.
Segun ken ni Assistant Ombudsman Mico Clavano, naipalaon iti joint resolution a naiparuk-at idi Disyembre 2021 ti pannakaibasura iti kaso kalpasan a napaneknekan a kurang ti ebidensya kontra ken ni Dizon.
Rakurak daytoy ni Clavano kalpasan ti panangiwaragawag ni National Bureau of Investigation (NBI) Director Melvin Matibag nga im-imbestigaren ti ahensya ti maipagarop a bidding ken funding anomalies kadagiti proyekto ti 2019 SEA Games, partikular iti New Clark City Sports Complex, basar kadagit baro a rimuar nga impormasyon.
Nupay kasta, kuna ni Palace Press Secretary Claire Castro nga idi paylaeng ket naimbestigaren ni Dizon ken naan-anayen a naabswelto.
Maipalagip a ni Dizon ti presidente ken chief executive officer (CEO) ti Bases Conversion and Development Authority (BCDA), a nangiwanwan iti konstruksiyon idi ti nasao nga sports complex.
