LAOAG CITY – Manamnama a maiyuswat ti kaunaan a Sunshine Queen a maysa a beauty pageant ditoy siudad ti Laoag para kadagiti kameng ti Lesbian, Gay, Bisexual, Transgender and Queer wenno LGBTQ Community.
Inbatad ni Atty. Charito Malicad, ti mangidadaulo iti Communications and Media Office ditoy siudad ti Laoag a maiyuswat ti nasao a programa inton Hunio 15 iti Ilocos Norte National High School Gymnasium.
Inlawlawagna a sakbay a mangrugi ti pormal a panagbibinnalubal dagiti makipaset iti beauty pageant iti oras ti 7:30 ti rabii ket adda ti maangay a Pride Parade iti oras ti 5:30 ti malem manipod iti Kapitolio Probinsial agingga iti Ilocos Norte National High School Gymnasium.
Kunana a daytoy a programa ket kas paset iti pannakaselebrar ti Pride Month para kadagiti kameng ti LGBTQ Community.
Mainaig iti daytoy, inpakaammo ni Atty. Malicad nga adda ti 13 nga opisial a kandidata a makipaset iti Sunshine Queen.
Innayonna a babaen iti daytoy a programa ket maitandudu dagiti plataporma ken adbokasia dagiti kandidata a kameng ti LGBTQ Community a makatulong iti panagdur-as ditoy siudad ti Laoag.
Kabayatanna, naammoan nga agbalinton a tinawen ti pannakaisayangkat ti Sunshine Queen ditoy siudad ti Laoag.
