LAOAG CITY – Nasuspenso ti klase iti Dingras National High School Poblacion Campus iti ili a Dingras kalpasan nga adda ti naawat ti maysa kadagiti mangisursuro a bomb threat.
Inbatad ni Mr. Jaymark Dancel, Teacher I iti nasao a pagadalan, kalpasan a naamoan na nga adda ti maipagarop a naimula a bomba iti panangisursurwan na ket nagtartaray a napan iti classroom na ken pinakaammoan na dagiti pada na a mangisursuro.
Segun ken ni Dancel, ti bomb threat ket naitext iti maysa a mangisursuro iti Senior High School a binigbig na laeng ti “Mam Caraballa” ken naipalaon iti text message ti “papasubugin namin school niyo mamaya may itinanim kaming bomba”.
Gapu ti daytoy, nasuspenso a dagus ti klase iti nasao a pagadalan babaen met laeng ti panangideklar ni Mayor Jeffrey Saguid.
Nagresponde met a dagus dagiti kameng ti Philippine National Police (PNP) iti ili a Dingras, Ilocos Norte Police Provincial Office (INPPO), bomb squad ken K9 dogs.
Napawilan amin dagiti estudyante ken uray dagiti mangisursuro a sumrek iti uneg agingga a saan nga ideklara dagiti otoridad a natalgeden iti uneg.
Kalpasan ti sumagmamano nga oras a panagsukimat dagiti otoridad ken dagiti K9 dogs ken nakumpirmaran nga awan ti bomba a naimula iti nasao a pagadalan.
