LAOAG CITY – Naipasan iti maikadwa a pannakaibasa ti maysa a resolusyon nga inpasa ni Konsehal Jason Perera para iti panagsweldo latta dagiti job order ken contractual iti gobierno lokal ditoy ciudad ti Laoag iti holidays uray saanda a sumrek iti trabaho.
Inlawlawag ni Perera a ti mapaspasamak iti agdama ket sumrek latta dagiti maseknan nga empleado iti opisina da uray no saan da a frontliners iti holidays tapno agsweldo da.
Nupay kasta, kuna na nga iti baet sumrek dagiti job order ken contractual iti trabaho da ket agtungpal to metlaeng nga awan ti ar-aramiden da.
Gapu iti daytoy, gagem ti inpila na a resolusyon a saanen a kasapulan a sumrek dagiti maseknan nga empleado iti holidays ngem rumbeng nga agsweldo latta dagitoy kas naipalaon iti linteg.
Innayon na a makainot pay ti kuryente no saan a sumrek dagiti empleado iti holiday.
