LAOAG CITY – Saan a maiyannatop iti paglintegan dagiti addang nga ar-aramiden ti City Administrator ditoy ciudad ti Laoag a ni Atty. Ed Von Cid.
Daytoy ti nagbalin a rakurak ni Konsehal Jason Perera kalpasan a naawat ti konseho ti legal opinion ti Department of Interior and Local Government ditoy probinsya mainaig iti panangsertipikar ni Atty. Cid a nagtaken kas Officer In Charge iti kallabes iti sumagmamano a gakat kabayatan ti session ti Sang Panlungsod.
Basar iti nagbalin a sungbat ti Department of Interior and Local Government ditoy probinsya babaen ti panangidaulo ti Provincial Director a ni Atty. Gerard Gallardo, ti pannakaiwayat ti kasar, panangaprubar wenno panangi-veto ti ordinansa wenno resolusyon, ken ti panangsertipikar kas urgent ti maysa a gakat ket saan a sakupen ti trabaho ti Officer-In-Charge iti maysa a lokal a gobierno.
Manaig iti daytoy, kiniddaw ni Perera a mangipaay ti konseho ti kopya ti nasao nga statement iti City Legal Counsel, City Administrator ken City Mayor tapno makita ti umno nga addang nga aramiden tapno masigurado ti pannakasurot a naimbag dagiti linaon ti paglintegan.
Maipalagip a nagbalin a nabara ti diskusyon iti nagbaetan da Konsehal Jaymie Fariñas ken Konsehal Donald Nicolas gapu iti panangsertipikar ka urgent ti City Administrator kadagiti sumagmamano a gakat.
Segun ken ni kenni Fariñas, nailanad iti pagannurotan ti Department of Interior and Local Government, a ti laeng local chief executive wenno mayor ti adaan ti karbengan a mangsertipikar kas urgent iti maysa a gakat, ngem inbatad met ni Konsehal Nicolas a daytoy ket maipalubos gapo ta ti city administrator ket agtaktakem kas Officer-in-Charge, a sinegundaan met dagiti city legal officers.
