LAOAG CITY – Nangiparuk-at ti precautionary hold departure order (PHDO) ti Branch 52 ng Manila Regional Trial Court (RTC) kontra kada Senador Jinggoy Ejercito Estrada ken sumagmamano a dati nga opisyal ti Department of Public Works and Highways (DPWH) mainaig kadagiti kaso a plunder ken maanomalya a flood control projects idiay Bulacan.
Iti pammilin a naiparuk[-at idi Pebrero 10, 2026 iti babaen ni Presiding Judge Juan Ranola Jr., binilin na ti Bureau of Immigration nga iraman dagiti nagan iti hold departure order list tapno maliklikan wenno malapdan ti ipapanaw da iti pagilian kabayatan a nakapenpen ti kaso da.
Karaman kadagiti nainaganan iti order ken da dati a DPWH Secretary Manuel Bonoan, dati nga Undersecretary Roberto Bernardo ken dagiti district engineers a da Henry Alcantara ken Gerard Opulencia.
Adda pay iti listaan ni dati a DPWH Undersecretary Cathy Cabral, a pimmusay idi Disyembre 2025, ngem nairaman latta daytoy iti dokumento kas paset dagiti orihinal a respondent.
Basar iti Department of Justice (DOJ), ti nasao nga addang ket paset ti panangipasigurado a sumango iti proseso dagiti naisaklang ken saanda a makapanaw iti pagilian.
Kabayatanna, nagpila ti counter-affidavit ni dati a DPWH Secretary Bonoan ken inrakurak na ti intensyon na nga agibiyahe idiay Estados Unidos iti baet ti sangsangwen na a kaso.
Basar iti report ti Commission on Audit (COA), adda ti P275 milyon a balor ti flood control projects iti Bulacan nga addaan ti iregularidad, a nagbalin a pagibasaran ti imbestigasyon.
