LAOAG CITY – Nagdinnungpar ti maysa a kotse ken motorsiklo iti Brgy. Apatut-Lubong iti ili ti Pinili.
Nabigbig ti driver ti kotse a Toyota Altis nga agmaris ti dapo a ni Roger Gazmen y Peralta, agtawen iti 70, naasawaan, dati nga Overseas Filipino Worker manipud idiay Anchorage Alaska, USA ken residente ti Brgy. Bonifacio, Cabugao, Ilocos Sur.
Nabigbig met ti nangiturong ti motorsiklo a Rusi nga agmaris ti nalabbaga a ni Maribel Oasay y Salmo, agtawen iti 60, awanan asawa ken residente ti Brgy. Gabut Sur, Badoc, Ilocos Norte.
Basar iti Pinili Municipal Police Station, kabayatan a dumaldalyasat ti kotse nga agpa-abagatan ket kellaat nga immagaw ti linya ti kalsada ti nakamotorsiklo a nangitunda ti panagdinnungparda.
Gapu iti daytoy, nagsagaba ti nakana a sugat iti nagduduma a paset ti bagi ti driver ti motorsiklo a dagus a naitaray iti Mariano Marcos Memorial Hospital and Medical Center iti siudad ti Batac babaen kadagiti nagresponde a personnel ti Rural Health Unit ken Bureau of Fire Protection iti ili ti Pinili idinto a nagsagaba met ti sugat iti akinkannigid a luppo ti nangiturong ti kotse a naitaray iti Karmelli Clinic and Hospital Inc.
Iti agdama, agtultuloy pay laeng ti pannakaiwayat ti naun-uneg nga imbestigasion iti napasamak a desgrasia.
