LAOAG CITY – Inbatad ni Police Master Sergeant Darwin Macalma, Chief Investigator ti PNP-Burgos a desidido ti pamilya ti biktima ti pammagkong iti Brgy. Ablan iti nasao nga ili a mangipila ti reklamo kontra iti suspek.
Nabigbig ti biktima a ni Ronald Rocero idinto a ti suspek ket ti kasinsin na a mismo a ni Jose Jomel Valencia.
Iti imbestigasyon ti PNP-Burgos, kuna ni Macalma a bayat a matmaturog ti biktima ken simrek ti suspek ti kwarto na ken binagkong na daytoy iti namin-dua a daras a nakasugatan ti akin-kannawan a bakrang ken bukot na.
Kunana a masansan nga umyan ti suspek iti balay ti biktima isut gapo na a makastrek latta daytoy iti anyaman nga oras.
Inlawlawag na a nakariing laeng dagiti kapamilya ni Rocero idi nagpaaray daytoy.
Dagus met a naitaray ti biktima iti Mariano Marcos Memorial Hospital and Medical Center iti ciudad ti Batac, ken ti nausar a kutsilyo ket agatiddog ti 13 inches.
Mainaig iti daytoy,kuna ni Macalma a basar iti palwag ti suspek ket arig na napunoan ti suspek wenno adda ti gura na iti kasinsin na a biktima.
Naamoan a nakainom ti nasanger ti suspek idi binagkong na ti kasinsin na.
Iti agdama ket adda iti kustudiyar ti PNP-Burgos ken maisagagana ti kasapulan a dokumento para iti pannakaipila ti kaso kontra kenkuana.
