LAOAG CITY – Narigatan dagiti kameng ti PNP ken BFP iti ili ti Pasuquin a nangiyaon iti maysa a lalaki a na-trap iti uneg ti bubon nga addaan ti kauneg a 10 a kadapan iti Barangay Nagsanga iti nasao nga ili.
Nabigbig ti biktima a ni Ronald Lagaso, naasawaan, ken residente iti Barangay Susugaen iti nadakamat met laeng nga ili.
Segun kenni Police Chief Master Sergeant Roel Silvestre, deputy chief of police ti PNP-Pasuquin, agarop alas-dyes itay bigat ket dalusan na kuma ti bubon ngem nagkapsot ken marigatan nga umanges ken rumwar kuma ngem saan a makapangato.
Gapo iti daytoy, tinulungan ti kadwa na ngem saan da a nagballigi gapo ta agkapsot ken marigatan met nga aganges rason a nagparescue da iti PNP.
Inlawlawag na a marigatan nga agpangato gapo ta maisangga ti tumeng ken bukot na gapo ta ti bubon ket nalawa iti baba ngem nailet iti ngato na.
Naamoan nga immabot iti innem nga oras sakbay a naiyaon ti pimmusayen a biktima nu sadino a basar iti doktor ket suffocation ti puon ti nakatayanna.
Kabayatanna, innayon ni Silvestre a ginalotan da pay ti siket ti lalaki tapno maiyaon da ngem maisangga ti lusob.
Nagturong pay iti lugar dagiti kameng ti Rural Health Unit ken nagusar ti rescue team ti backhoe ti lokal a gobierno.
Naamoan kinutkutan da ti abay ti bubon ken idi nabatog iti ayan a mismo ti lalaki ket tinubtob da ti lusob ken timmulong dagiti kameng ti BFP-Bacarra ken BFP-Laoag.
