LAOAG CITY – Kinabkabil ti sumagmamano nga indibidual ti maysa a lalaki gapu ta napagatapan a boyfriend isuna ti maysa a balo iti Barangay Saud iti ili ti Pagudpud.
Segun iti biktima a ni Mr. Rodel Ruiz Sacro a residente iti Barangay Lydia iti ili ti Marcos, inawis isuna dagiti kaanakanna a mapan ag-overnight iti ili ti Pagudpud.
Inbatadna a napanda gimmatang ti arak sakbayda a nagturong iti maysa a resort.
Kunana a kabayatan nga agiinumda nga agkakabagian ket kellaat a kinugtaran isuna ti baro ti maysa kadagiti kasangoda ti lamisaan.
Gapu iti daytoy, kuna ni Sacro a timmakder ken nagturong iti luganna ngem sinurotda isuna ken pinilitda a lukatan ti ridaw ti luganna isut gapuna a rimmuar daytoy aglalo ket mamati nga awan met ti basolna.
Nupay kasta, apaman a rimmuar iti luganna ket ditoy metten a dinangranda isuna a nangitunda ti pannakasagabana ti sugat iti nagduduma a paset ti bagina.
Mainaig iti daytoy, inpettengna a kalpasan a kinabkabilda isuna ket sinaludsodda no kinuyogna ti inada a napan iti Sabang Footwalk banag a naiget a naglikudanna.
Innayonna nga adda metten ti panagsasaritada kadagiti nangkabkabil kenkuana no sadinno a dimmawatda ti pammakawan kekuana ngem saanna daytoy nga inawat.
Kabayatanna, naammoan a dagiti nangkabkabil ken ni Sacro ket isuda Roland Bayudan, Resty Bayudan, Mark James Nidoy, Darren Vincent Nidoy ken John Paul Alunan.
