LAOAG CITY – Nasugsugatan ti maysa a lalaki kalpasan ti pannakadesgrasya na iti Barangay San Blas iti ili ti Paoay.
Binigbig ni Police Lt. Marlon Martinez, ti deputy chief of police ti PNP-Paoay a ni Gilbert Riel Dahuya y Flojo, agtawen ti 27 ken residente iti Barangay 13, Dolores iti nadakamat nga ili.
Kunana nga iti imbestigasyon da, ti kotse ket agturong iti laud a direksyon ken aksidente a nadungpar na ti steel barrier ti maysa a pawnshop.
Gapo iti daytoy, napukawan iti kontrol ti biktima ken nadungpar na manen ti concrete perimeter fence ti simbaan nga adda iti bangir a kalsada.
Segun kenni Martinez, kas resulta ket na-fracture ti akin-kannawan nga ima ti biktima ken ada ti dugol ti muging na idinto a ti lugan na ket nakaro a nadadael ti sango na ken dagus a naitaray iti ospital.
Inbatad na a basar pay ti imbestigasyon da ket mabalin a napaspas ti panagpataray ti biktima.
Naamoan nga agawid kuman ti biktima a naggapo iti maysa a pasken iti ciudad ti Batac idi napasamak ti insidente.
Innayon na nga iti pannakisarsarita iti biktima ket awan met ti naibagbaga daytoy nga adda ti liniklikan na ken saan da pay a masigurado no nakainom daytoy ti nasanger ngem agbasar dan to iti medical legal daytoy.
