LAOAG CITY – Nakita a maysan a nalamiis a bangkay ti maysa a lalaki iti igid ti baybay iti Barangay Naglicuan iti ili ti Pasuquin.
Basar iti Pasuquin Municipal Police Station, ti biktima ket nakasuot ti nangisit a jogging pants, medyas ken puraw a bado no sadinno a mapattapatta nga agtayag daytoy ti 5’6 ken addaan ti tattoo iti akinkannigid a tumengna.
Iti naiwayat nga imbestigasion dagiti otoridad, nagturong ti maysa a residente iti nasao a barangay iti baybay tapno kitaen ti sasaaden ti kondision iti kabaybayan ket ditoy a nakitana ti biktima nga awananen ti biag.
Mainaig iti daytoy, inpakaammo ni Municipal Health Officer Dr. Diophantos Acob, ti biktima ket natayen addan ti agarup innem nga oras sakbay a nakita daytoy.
Rumrummuar a ti rason ti pannakatay ti biktima ket gapu iti pannakalmes ken awan ti nakita a foul play.
Kabayatanna, agtultuloy ti naig-iget nga imbestigasion dagiti otoridad mainaig iti insidente.
