LAOAG CITY – Nakita a maysan a nalamiis a bangkay ti maysa a lalaki iti kapagayan iti Sitio 5 iti Barangay Maananteng iti ili ti Solsona.
Basar iti Solsona Municipal Police Station, kabayatan a magmagna ti maysa a residente iti nasao met laeng a barangay ket nakitana ti biktima nga awanen ti biagna.
Iti imbestigasion dagiti otoridad, segun iti ina ti biktima, napan nakiminatay ti anakna iti kabagianda ken adda ti naiyuswat a panagiinomda.
Naammoan nga idi agawid ti biktima ket kellaat a nakapasar ti epilepsy a nangitunda iti pannakatnagna iti kapagayan.
Kabayatanna, maibasar iti postmortem examination ti biktima ket awan ti pakalasinan nga adda ti foul play a napasamak.
