LAOAG CITY – Napaltogan ti maysa a lalaki iti Brgy. 6 iti ili ti San Nicolas.
Segun ken ni P/Maj. Reginaldo Dalipias, Hepe ti San Nicolas Municipal Police Station, nabigbig ti biktima nga agtagikua ti carinderia idinto a ti suspek ket indiskribir ti asawa ti biktima a natayag ken nakuttong a nakasuot ti jacket nga adda ti kallugongna.
Inbatadna a basar iti inisyal nga imbestigasionda, kabayatan nga agiplasplastar ti biktima nga aglukat iti carinderiada ket kellaat nga immasideg ti suspek kenkuana kagiddan ti namindua a daras a pinaputukan isuna ti paltog.
Gapu iti daytoy, kunana a nagsagaba ti dua a tama ti paltog ti biktima iti luppona a dagus met a naitaray iti Black Nazarene Hospital iti ili ti San Nicolas.
Inlawlawagna nga adda ti dua a basyo ti paltog ti calibre 45 ti narekobre iti lugar a nakapasamakan ti insidente.
Iti agdama, saanda pay unay a nakasarsarita ti biktima gapu ta kinasapulanna ti insigida a pannakaipadalan ti operasion.
Naammoan a kinamat pay ti asawa ti biktima ti suspek nga adda iti lugar idi napasamak ti insidente.
Kabayatanna, agtultuloy pay laeng ti maiwaywayat a naun-uneg nga imbestigasion dagiti otoridad no ania ti motibo ti suspek iti pammaltog.
