LAOAG CITY – Naipilan ti kaso a panaglabsing iti RA 10591 kontra iti maysa a lalaki kalpasan a natiliwan nga iligal nga agik-ikot ti paltog iti ili ti Bagui.
Segun kenni Police Captain Julius Basallo, ti chief of police ti PNP-Bangui, adda ti concern citizen a nagreport kadakuada seknan iti panagikot ti maseknan ti paltog.
Iti panagimbestigar da, kuna ti hepe a naggapo iti maysa a paginuman ti suspek ken dimmagas iti maysa Sari-Sari Store iti paset ti Sitio Timpuyog, Barangay Baruyen ket ditoy a maipagarop nga inparang na ti homemade shotgun nga iggem na ken inparabaw na iti lamisaan.
Gapo iti daytoy, inreport ti lalaki iti pulisya rason a dagus da a nagresponde.
Kunana a naaktuan da nga adda ti iggem ti suspek nga armas isut gapo na a dagus a nagtaray iti uneg ti sari-sari store ngem naarestar latta daytoy.
Nakumpiskar da manipud iti suspek ti maysa nga homemade caliber .22 revolver, maysa nga homemade shotgun ken tallo a bala ti 12 gauge shotgun.
Iti agdama ket nagtalinaed iti kustudiyar ti PNP-Bangui ti suspek.
