LAOAG CITY – Natay ti maysa a lalaki kalpasan a na-heat stroke kabayatan a magmagna a mapan iti poblacion iti ili ti Adams.
Segun ken ni Police Lt. Eddie Valdez, ti chief of police iti ili ti Adams, nakita laengen a nakadasay iti kalsada ti biktima a ni Lito Purdos, agtawen ti 77.
Inbaga na a timmawag ti anak ti biktima tapno ipakaammo nga adda ti nakakita iti ama na a nakadasay iti kalsada bisinidad iti Sitio Malaggao iti nasao nga ili.
Iti panagturong da iti lugar kadwa da dagiti kameng ti Rural Health Unit (RHU) ket indeklara ni Doctora Bielmaju Walley Bawingan a pimmusayen ti biktima.
Awan met ti nakita a foul play iti pannakatay ti biktima no di ket basar ken ni Doctora Bawingan ket pimmusay daytoy gapu iti heat stroke.
