LAOAG CITY – Dead on arrival ti maysa nga indibidual kalpasan a nabagkong iti Barangay Torre iti ili ti Currimao.
Nabigbig ti biktima a ni Mario Pascua, agtawen ti 48, awanan asawa, ken residente iti nasao a barangay.
Segun ken P/Cpt. Melvin Soriano hepe ti Philippine National Police iti ili ti Currimao, apaman ti panagresponde da ket nakapakleben ti biktima rason nga insigida nga intarayda daytoy iti Municipal Health Unit ngem indeklara ti nangtaming a doktor a dead on arrival.
Iti inisyal nga imbestigasyon dagiti otoridad, naamuan a masansan a mabarbartek ti biktima ken masansan nga agprobokar no mabartek.
Idi laeng kalman agarup alas singko ti bigat adda nakangeg a pagsasaw-an ti agnagan ti “alyas Mikyung”, kaanakan ti biktima, ti uliteg na gapu ta nabartek manen daytoy.
Ngem sumagmamano a minutos ket tinalawan ni Mikyung ti uliteg na ken nagturong iti igid ti baybay.
Iti pannakisarsarita dagiti otoridad iti witness, inlawlawagna nga agarup alas sais ti bigat ket nakita na ti biktima a nakapakleben iti ruar ti pagtaengan na ken apaman a nagsubli ti kaanakan na ket inbaga a na kitaen na ti uliteg na gapu ta arigna saanen nga agang-anges pay.
Mainaig iti daytoy, inpakammu ni P/Cpt. Soriano a saan met nga agsusurot ti statement ni Mikyung apaman a nakasarsarita da daytoy, rason a ti kitkitaen ita ti pulisya a person of interest ket isuna.
Nupay kasta, mannarimaan pay laeng ti pannangisayangkat ti Philippine National Police iti ili ti Currimao tapno maamwan ti adda iti likodan ti napasamak a pammagkong.
Kabayatanna, iti eksaminasyon ti doktor, dua ti tama ni Pascua, maysa iti akin-kannawan nga abaga na ken maysa iti akin-kannigid a paset ti buksit na.
