LAOAG CITY – Balligi a natiliw ti maysa a lalaki iti naiyuswat a drug buy-bust operation iti nagtitipon a pwersa ti Provincial Drug Enforcement Unit (PDEU), PDEA, City Drug Enforcement Unit ken PNP-Laoag iti MV Fariñas St., Barangay 9 ditoy ciudad.
Nabigbig daytoy a ni Willy Villanueva, agtawen ti 39, ken residente iti Barangay 21 ditoy ciudad ti Laoag.
Naarestar daytoy kalpasan a nakagatang ti police pusuer buyer ti maipagarop nga iligal a droga ken kalpasan a naiyawat ni Villanueva daytoy ket dagus a ginammatan dagiti otoridad.
Nakumpiskar dagiti otoridad ti sachet a ginatang ti pusuer buyer, buy-bust money a sangaribo a pisos ken iti panangkapkap da kenni Villanueva ket nakumpiskar da ti maysa pay a sachet ti maipagarop a shabu.
Naamoan a ni Villanueva ket adda iti drug watchlist Provincial level.
Mainaig iti daytoy, kuna ni Villanueva a mapan na kuma alaen ti motorsiklo iti Barangay Talingaan nga inpabulod kenkuana ti innaganan na ti LA Andres, ngem maipagarop a ginuyod isuna dagiti pulis ken nadanog ti panga na.
Ti motorsiklo ket maipabulod kenkuana kas agserbi a service na para iti panagsibog na ti mula iti Barangay Talingaan.
Kunana a kalpasan daytoy ket nabayag da pay laeng a naka-standby iti bypass sakbay da a napan iti Barangay 9 ken pinababa da daytoy ken kellaat a pinagpakleb da daytoy ken inakusaran na dagiti pulis a nangipabulsa ti sachet ti iligal a droga.
Gapo iti daytoy, inpetteng na a saan na a kukua dagiti nakumpiskar nga iligal a droga.
Kinumpirmaran na met a drug surenderee ken addan ti sumagmamano a bulanen ti napalabas idi naudi a nagusar ti iligal a droga.
