LAOAG CITY – Naisangsangayan ti maysa a kape iti China a nalaokan ti sibuyas.
Adu a netizens ti nagabalin nga interesado iti maysa a video ti panagaramid iti latte a nalaokan iti bulong ti sibuyas.
Mainaig iti daytoy, tapno maaramid ti nasao a naisangsangayan a coffee blend, umuna a gilingen dagiti bulong ti sibuyas iti baso, ikkan ti yelo, gatas, ken kape sakbay nga inayon ti adu a toppings a bulong ti sibuyas.
Awan ti makaammo no sadino wenno kaano a naparsua ti spring onion latte, ngem kadagiti nabiit pay a bulan, adu a cafeteria ti agar-aramid iti nadakamat a blend tapno makagun-od ti atension iti online.
Maysa laeng daytoy kadagiti umad-adu a bilang dagiti naisangsangayan a kombinasion a pagaammo kas ‘dark cuisine’ idiay China.
Kabayatanna, inbaga dagiti dadduma a netizens a saan da pulos a kiddawen ti dumawat ti onion-free coffee, idinto nga ado ti naintriga iti naisangsangayan a latte.
