LAOAG CITY – Inpasingked ni Mayor James Bryan Alcid a nakasagana ti lokal a gobierno ditoy siudad ti Laoag kadagiti emerhensia a mapasamak kabayatan iti panangsarabo ti baro a tawen.
Segun kenkuana, kangrunaan a nakasagana dagiti kameng ti Bureau of Fire Protection, Department of Public Safety ken Laoag City General Hospital a mangresponde ken mangtaming kadagiti agbalin a biktima ti paputok.
Inbatadna a masapul ti naan-anay a panagan-annad tapno naragragsak met laeng iti panangsarabo ti baro a tawen.
Inlawlawagna a saan unay nga agbartek ken agay-ayam ti paputok wenno dadduma pay a wagas a mangitunda ti risgo iti maysa nga indibidual.
Inpettengna a nasaysayaat ti panangliklik ngem iti panangpaagas kadagiti sugat a mabalin nga epekto ti panagusar ti paputok.
Mainaig iti daytoy, inpakaammo ni Mayor Alcid nga adda ti idiaya ti Ilocos Norte 1st District Congressional Office a fireworks display a mabalin a maimatangan iti Laoag City bypass road iti panangsarabo ti baro a tawen.
Kabayatanna, bayat a maisursurat daytoy a damag ket awan ti nairekord nga aniaman a fireworks-related injuries ditoy siudad ti Laoag kas maibasar ken ni Dr. Rodrigo Catcatan, mangidadaulo ti City Health Office.
