LAOAG CITY – Inpakaammo ni Atty. Charito Malicad, City Tourism Officer a plano ti lokal a gobierno ditoy siudad ti Laoag a gatangen ti daga a nakapalikawkaw iti Gabu Watch Tower.
Daytoy ket tapno mapagbalin daytoy a maysa kadagiti tourist spot a mabalin a daywen dagiti turista nga agturturong ditoy siudad.
Segun kenkuana, ti daga iti aglawlaw ti Gabu Watch Tower ket kukua dagiti pribado nga indibidual isu a kalikagumna a makasarita dagitoy tapno mapagnunumoan ti nasao a banag.
Inlawlawagna a no maipursige daytoy ket ad-adda pay a mapapintas ti aglawlaw ti Gabu Watch Tower ken adda ti maipatakder a nagduduma a pasdek a manggutigot kadagiti turista.
Maipalagip a ti Gabu Watch Tower ket naipasdek idi Spanish colonial period ken maus-usar nga outpost para kadagiti tattao tapno mapakadaanda no adda ti pirata a sumangbay.
