LAOAG CITY – Inpakaammo ni P/Lt.Col. Ryan Retotar, Hepe ti Laoag City Police Station a saan a bomba ti linaon ti karton iti sirok ti SUV a naka-parking iti dakkel a mall ditoy siudad ti Laoag.
Segun kenkuana, kabayatan ti panag-roving dagiti blue guards iti nasao a dakkel a mall ket adda ti naobserbaranda a mapagat-atapan a karton a naglaon ti maipagarup a bomba.
Gapu iti daytoy, kunana nga insigida nga in-report dagiti blue guards kadagiti otoridad maipanggep daytoy a banag.
Inpasingkedna a nagresponde ti Laoag City Police Station, Explosive Ordnance Disposal, City Disaster Risk Reduction and Management Office ken dagiti kameng ti Bureau of Fire Protection.
Inlawlawagna nga apaman a linukatan dagiti otoridad ket ditoy a naduktalan a ti linaon ti nasao a karton ket maysa nga endangered species wenno tikka no sadinno a nakaruk-at daytoy.
Kunana a basar iti palawag kadakuada ti driver ti SUV, inkabilda iti sirok ti karton tapno saan a mapudotan iti uneg ti luganda.
Inpaganetgetna a mabalin koma a makasoan dagiti maseknan gapu ta nagtiliw dagitoy ti ayup a maibilang kas endangered species ngem awan ti ebidensia kalpasan a nakaruk-at ti tikka kas maiyataday iti environmental laws.
Innayonna a napagsasaritaanda iti management ti dakkel a mall ditoy siudad ti Laoag ti panangnayon ti Close Circuit Television wenno CCTV camera a maimuntar iti aglawlaw para iti ad-adda pay a seguridad ti publiko.
