LAOAG CITY – Kalikagom ti local chief executive iti ili ti Pagudpud nga agbalinen a ciudad ti nasao nga ili intono 2028.
Kuna na nga itultuloy da nga ipatungpal dagiti narugyan dagiti immunan a nagturay iti ili ti Pagudpud para iti pagsayaatan ti umili.
Inbatad na pay nga aramiden da amin a kabaelan da tapno ad-adda pay nga agbalin a naprogreso iti ili ti Pagudpud babaen metlaeng iti tulong dagiti umili.
Innayon na a masapol a mapasayaat ti panagbiag iti tunggal umili babaen ti panangallukoy da iti ad-ado nga investors a mapan agpuunan iti nasao nga ili.
Karaman kadagiti target a padur-asen ti gobierno lokal ket ti pannakapasayaat ken pannakapapintas ti Municipal Beach Resort, pannakaipasdek ti nayun a pagadalan ken pannakaipaay ti ad-ado a trabaho.
Maipalagip a nagbalin a 1st class municipality ti ili ti Pagudpud idi laeng Disyembre ti napalabas a tawen manipod iti 4th class municipality.
