LAOAG CITY – Inbilin ti liderato ti Land Transportation Office (LTO) iti amin a regional director na iti intero a pagilian a palawaen pay ti panangiyuswat ti road safety seminar kadagiti tricycle driver.
Daytoy ket kalpasan ti panangibilin ni LTO Chief Vigor Mendoza II a mangbukel ti Tricycle Operators and Drivers Association (TODA) Learning Centers a maipatakder iti naduduma a paset ti pagilian.
Segun ken ni Mendoza II, masapol a dumalan iti naun-uneg a road safety seminar dagiti tricycle driver tapno masursurwan dagitoy iti obligasyon da ken maamoan ti umiso nga impormasyon seknan iti road safety.
Malaksid iti daytoy, maipakaammo pay kadagiti tricycle driver dagiti karbengan da.
Kagiddan iti daytoy ket paipaspasigurado ti LTO chief kadagiti regional director ken ti chief dagiti district office a mangipatungpal ti naurnus a koordinasyon kadagiti LGU, kangrunaan na ket isuda ti mangipapaay ti permit to operate kadagiti tricycle driver.
Plano ti LTO a pagbalinen a regular ti seminar para kadagiti tricycle drivers seknan iti road safety, kangrunaan na kadagiti driver a mangnamnama laeng iti panagpasada para iti kasapulan da.
