LAOAG CITY – Kinumpirmaran a mismo ni Governor Matthew Marcos-Manotoc ti maikapat a kaso ti covid-19 ditoy Ilocos Norte.
Ti maikapat a kaso ti covid-19 ditoy probinsya ket maysa nga OFW a babai manipod iti Dubai, agtawen ti 30, masikog ken taga Barangay Catangraran iti ili ti Solsona.
Dimteng ti nasao nga OFW iti ili ti Solsona idi Hunyo 15 ken iti kabigatan na Hunyo 17 ket naadmit iti Mariano Marcos Memorial Hospital and Medical Center iti ciudad ti Batac no sadinno nga iti dayta met laeng nga aldaw ket dimmalan ti swab test.
Rimuar ti resulta ti swab test ti pasyente idi miyerkules, Hunyo 17 ken positibo daytoy para iti SARS-COV-2.
Maalarma met ni Governor Manotoc gapu iti nagsaruno a pannakairekord ti dua kaso ti covid-19 ditoy probinsya a dagiti pasyente ket agpada nga OFW.
Nagyaman met ti gobernador kadagiti frontliners ken inbalakad na a masapol nga itultuloy ti panagusar ti face mask, agbuggo ti ima, agusar ti alcohol ken obserbaren ti social distancing.
Innayon na a gapu kadagiti rinibo a returning residents ditoy probinsya ket nangipatungpal dan ti protocol kas ti identification ken verification para kadagiti sumrek ditoy probinsya, macheck-up ti salun-at da ken mai-quarantine dagiti maseknan.
Immun-una iti daytoy, sakbay a naiparuk-at ti opisyal nga statement manipod iti gobernador ket immunan a kinumpirmaran ni Mayor Joseph de Lara iti Bombo Radyo Laoag a maysa a kailian da nga OFW ti nagpositibo ti covid-19.
Kalpasan ti opisyal nga statement ti gobernador ket nangiparuk-at metten ti statement ti LGU-Solsona partikular iti opisina ni Mayor Joseph de Lara mainaig iti panangipatungpal dan ti lockdown kadagiti nagduduma a quarantine facilities iti nasao nga ili, karaman iti Rural Health Unit (RHU), PNP, Municipal hall ken BFP.
Naipatungpal met a dagus ti contact tracing kadagiti possible a nakapulapol ti pasyente tapno saanen a maiwaras pay ti nasao a virus.
Kabayatanna, negatibo ti resulta ti anti-body test dagiti innem nga Overseas Filipino Workers (OFW) a nakaluganan ti maysa a taga Ilocos Sur a nagpositibo ti covid-19.
Daytoy ti kinumpirmaran a mismo ni Doctor Norman Rabago, ti Covid Consultant ditoy probinsya.
Gapu iti daytoy, kuna ni Rabago a saanen a kasapulan a dumalan ti PCR test dagiti nasao nga OFW.
Maipalagip a nag-negatibo iti rapid test dagiti innem nga OFWs a taga ditoy ciudad ti Laoag, ili ti Vintar, Adams ken Paoay.
Iti sabali a bangir, inpakaammo ni Doctor Rabago nga addan iti stable a kondisyon ti pasyente a taga Barangay San Nicolas iti ili ti Vintar, awanen ti makitkita kenkuana a sintomas ken naka-strict quarantine.
Innayon na a bassit ti posibilidad nga agwaras ti virus a kimmapet iti nasao a pasyente, ngem nabalakadan dagiti nakapulapol na a masapol a dumalan ti test ken ag-quarantine.
