LAOAG CITY – Inanunsio ni Presidente Ferdinand Marcos Jr. a mangrugi inton Martes, Abril 14, ipatungpal ti dakkel a rollback iti presio ti langis.
Umabot iti sumurok P20 ti ibaba iti presio ti diesel, P4.43 ti maikissay iti kada litro ti gasolina idinto a bumaba met iti P8.50 iti kada litro ti presio ti kerosene.
Inbatad ni Presidente Marcos a dakkel daytoy a nam-ay para kadagiti driver, commuter ken kadagiti pamilia a Pilipino nga agtultuloy nga apektado ti nangato a presio ti krudo.
Nupay kasta, inadmitir ti Presidente a saan pay nga umdas ti nasao nga addang.
Inpettengna nga agtultuloy ti ar-aramiden ti gobierno tapno makissayan ti epekto ti panagngato ti presio dagiti magatgatang iti inaldaw-aldaw a panagbiag dagiti umili.
Inpaganetgetna a saan nga agsardeng ti gobierno agingga a saan a maipababa ti gastos iti transportasion, taraon ken dadduma pay a kangrunaan a kasapulan.
Kunana nga adda pay dagiti sumaruno nga anunsio kadagiti masungad nga aldaw ken lawas mainaig iti nayon nga addang ken tulong manipud iti gobierno.
Inpasigurado ni Marcos a saan a baybay-an ti tunggal Pilipino iti baet ti agdama a karit ken agtultuloy ti panangikagumaan ti gobierno tapno marikna ti nam-ay iti tunggal pamilia.
